Act 22 | ASO | STEP | Lingine gono'nemote ido' neze zuho lingine monovo'ne lo-lengemelesa luze. Gili minilo.

Acts 22

Paulo' Aza Lulo Do Velepe' Izine' Ne'mi Gamazi Lo-ngimine' Gamazi

(Aposolo' 9:1-19; 26:12-18)

1 Lingine gono'nemote ido' neze zuho lingine monovo'ne lo-lengemelesa luze. Gili minilo. 2 Ne'mine lo engi' Zuda veti gamaziuti' nolo-ngimivo gili ingine elese' iki gapepe' i minikevo imine' molo ti' lo lo-ngimine': 3 Naza nene Zuda ve Kilikia misubouko Taliso ebeku' gidani' nouvoni'za mene ebeku' ogo mino tisa' ma Gamaliele' eze gizeneu' mino eze gamazi've gelo mino naba uvoni' ve. Ne'mine ogo mino mono' apizo lo-neme' neme' ivo avotemote li hukani' gamazi gele lisihe' ogovo' gelo osu' luvoni' ve. Ido' idi'nise nene lingine O'moso e'metilisa gilingili ikehe. Naza nene lingine adi'mino nazasi a'mine'mino amuzo molo minuvoni' ve. 4 Ne'mine ogo Izesu' akalo' nene e'metilisa vani' aleve goboni molo-ngedo hili osu' lilizave lo vene' vemoho' muki' nene a'nido' nala' izo hulo nala' numungu' o-ngedaa' uvoni' ma ve. 5 Eveneto' medelo mino O'moso inite' lehize-daa' ive nabasi ido' lengi' mono' gizebo vetine mukikisi ingine gili nizave. Nemu' nene ha li-lingimilisave. Ingine leze Zuda veti zuho Damasiko ebeta nizavemu' luhuvo nite' gizi nimikevo nene holela do vo Izesu' evenele nalava ngemo ngele'mizo Zelusalemi ebeta okuvo engi' lihime apasi-ngidi ngibililizave lo gelo do vuvoni'.

6 Ido' akalo' novo Damasiko ebe' do noalituvo holise' tuvelu kiloku ne'mido' Okulumokuti' labana' naba galinali lemo do vodo vodo o-nidine'. 7 Ne'mine ogavo misubou' lemo pou' lo ongo nouvo a'minguti' nenikumu' gamazi ma ti' lo soto' ogavo giluve: Saulo, Saulo, gaza nanitekumu' goboni nomolo-nedane. 8 Lavo naza ti' lo lo-imuve: Guvekasi ve gaza zaho ve lokuvo aza ti' lo lo-nimine': Gaza goboni molo-nedaa' anive Nasalete ve Izesu' ma ne noluve. 9 Ti' lo nolivo nezesi maka' minunive ingine labana' iline' nene ningikeha gamazi lo-nimine' nene gilamani' ve. 10 Ne'mine ogavo naza ti' lo lo-imuve: Guvekasi ve naza nadi' olove. Lokuvo Guvelesi ve aza ti' lo lo-nimive: Gaza oto Damasiko numuda vozo. Vo hetelanivo gono muki' daline lo molo-gede nouvoni' nene li-gimilisave. 11 Ti' lo lavo oto ve'ne ningo olo' labana' lidi'mo ve'ne lenge lenge lavo inite' ninge lamine' amuvo maka' monunivete a'nelo' di nele'mizavo Damasiko numuda vune' ve.

12 A'mida ve ma minine' gulive Anania' aza nene mono' ve lamine' mino Mose' lo huko line' gamazi do mehenelo' molo minaa' ive Zuda ve muki' nete gamangi mili-daa' ani'. 13 A'mine ve nene nouvoda ogo ote mino ti' lo lo-nimive: Saulo, gaza neze zuho make, veka gohi ninge lamine' ozo lavo noline' velesi geto ningo vonu' biluve. 14 Vonu' nobiluvo ti' lo lo-nimive: Avotemote gelekele' i-daa' ani' O'moso ne'mo gei' mo noso molo-gedo O'moso asi've giline' initekumu' gazasi gelo ido' gaza nene ei' O'mosolati' lisihe' ogo molo oga' ive gehepeve ningo a'mine'mi veleti' gamazi've geleline lo do kegeso gele'mize molave. 15 Gaza inite' mata' ningo gelaine' ne'mi gamazi've lo eze monovo nene numudo' namado' ve lo soto' ogo lo-ngemeline. 16 Ido' idi'nise nene gaza nanitekumu' gizebo iline. Gaza oto noso holozo. Eze gulivelo' lanivo lihimeka apase-gedelive.

Paulo' Heta Ato' Vetida Viline' Gamazi Guvelesi Ve'mo Lo-imine' Nene Lo-ngimine' Gamazi

17 Anania' ti' lo lo-nemavo ne'mine ogo alinge' nene Zelusalemi numuda tine' molo vo mono' numuno nabau' dizo O'mosola nolo Guvelesi ve ninguvoni' nene vamu' gidini ninguve. 18 Ve'nelo' o molo ti' lo lo-nimive: Me ebeku' aleve nene gei' vekati' nenikumu' gamazi'ne lo-ngemeline' nene gili hulilisaze. Nemu' gaza geto oto Zelusalemi numuno ebekuti' lite' lo lemo vozo. 19 Ne'mine lavo naza ti' lo lo-imuve: Guve'nesi ve make, neze monovo'ne ningi gili osu' li nizave. Naza nene Zuda veti mono' numu'ningu' numu'ningu' dizo geikumu' gili ele'vole' iga' ave ave do soto' ogo ngebelo nala' numungu' hulo-ngedaa' uvoni' ma neive. 20 Ne'mine ogo gei' gamazika lo soto' oga' ive Setehano'ni nene bililisa niigi saketi'ine kuluhizi milikado' gizebo o nouvo bilikevo helavo naza giluvo lamine' ine' ma neive. 21 Ne'mine lo lokuvo ti' lo lo-nimive: Gaza vozo. Naza golo gohiuko heta ato' vetida nogimiseluve.

Amiliti Guve'inesi ve Naba Aza Paulo'ni Gizebo O-dine' Gamazi

22 Paulo' aza gamazi ma nolo-ngimivo haza gili minani'za aza ti' lo Guvelesi ve'mo heta ato' vetida imiselelesa line' gamazi nene lo-ngemavo nololo' di gani mangilise niigi ti' li lani': A'ne'mine ve mene velesi misubou' haza mineline' edamiliko helavo osu' lilive. 23 Ne'mine li gani mangilise igi ngizebolo' molavo saketi'ine apasi hibi'hibi' izi u'musupo gisi huli veleta ani'. 24 Ne'mine igi nizavo amiliti guve'inesi ve naba'mo lavo Paulo'ni ele'mizi amiliti numungu' dizani'. Ne'mine ikevo evene' nete gani mangilise i-dani' ne'mi monovo lo soto' ogavo gelelove lo amiliti guve'inesi ve aza ami nene lihime'vemu' longo' igi gasavasi nala' amuzo malahetunu' bililizave lo lo-ngimine'. 25 Ne'mine lo lavo gizene analo' nala' di di oti-di nizavo amiliti gizebo ve ngomo ma a'mido' neivo Paulo' aza longo' o-do ti' lo line': Naza Loma ve nouvoni'zoo lou' gamazi li hukangu' nene Loma ve ne'mine i-ngidamilo li li hukamani' neivosa neze goni' nene olihe gilamado' gasavasi nalatunu' nibililisa nahe. 26 Lavo gelo gizebo ve aza amiliti guve'inesi ve naba neida vo lo soto' ogo ti' lo-imine': Nadolosa lane. A'mine ve nene Loma ve ma nenako. 27 Lavo guvelesi ve naba aza Paulo' neida vo longo' o-do line': Olo. Gaza nene Loma ve nabe. Lavo Paulo' aza line': Oo. 28 Lavo Guvelesi ve naba ne'mo ti' lo lo-imine': Naza nene ebe' maukoti' ve mino meni naba hizo Loma ve lolo' ogo nouvoni' ma neive. Ne'mine lo lavo Paulo' ti' lo line': Ne'mine ogane'za naza nene Loma vete gidani' ma nouvo nave. 29 Lo lavo Paulo'ni bililisa igi minani' nene noline' velesi hulani'. Hulikevo guvelesi ve naba nene Paulo'nimu' Loma ve neive lo gelo gizene analo' nala' dangumu' nene ehelele izine'.

Paulo' Aza Zuda Kanisoleliti ve'nido' Ote Mino Gamazi Lo-ngimine' Gamazi

30 Ne'mine ogavo ingi go' lavo amiliti guve'inesi ve naba ne'mo Zuda ve ingine Paulongumu' nanimu' gili goloso i-dave lo ne'mi monovo gelelove lo eveneto' medelo mino O'moso inite' lehize-daa' ive nabasi ido' engi' kanisole mukikisi vise lo-ngemavo igi di gese' ikevo Paulo'ni ele'mize ve'nido' molani'.